Tenor in model applitgà en ils blers pajais da l'Europa è la ComCom vegnida fundada sco instanza independenta per surpigliar la rolla dal regulatur sin il martgà liberalisà da la telecommunicaziun, sco quel exista en la Svizra dapi il 1. da schaner 1998.
Essend che la confederaziun, sco acziunaria da maioritad da l'interpresa Swisscom -anteriura monopolista - na duess betg esser a medem temp derschadra e partida, ha il legislatur creà in'autoritad independenta per quest pensum, numnadamain la ComCom.
L'independenza da la ComCom è francada en la lescha da telecommunicaziun (art. 56 al. 2 LTC):
"La cumissiun n'è concernent sias decisiuns betg suttamessa a directivas dal cussegl federal e dals departaments. Ella è independenta da las autoritads administrativas. Ella dispona d'in agen secretariat".
Questa independenza da la ComCom da la regenza e da l'administraziun na vul dentant betg dir ch'ella haja maun liber d'agir, la ComCom agescha adina sin basa da la lescha da telecommunicaziun. Directiva per ella è surtut l'intent da la lescha: La finamira surordinada da la lescha da communicaziun è in provediment cumplessiv da las abitantas e dals abitants, da l'economia e da l'administraziun cun servetschs da telecommunicaziun multifars, favuraivels, d'auta qualitad sco er abels da concurrer sin il plaun naziunal ed internaziunal. Ultra dal provediment fundamental cun servetschs da telecommunicaziun garantids ozendi per tuts circuls da la populaziun en tuttas parts dal pajais duai questa finamira vegnir realisada cun stabilir ina concurrenza efficazia (art. 1 LTC).