Mandat da cumissiun

La cumissiun federala da communicaziun (CumCom) è l'autoritad independenta da concessiun e da regulaziun sin il sectur da telecommunicaziun ed è vegnida creada cun la lescha da telecommunicaziun (LTC) dals 30 d'avrigl 1997. La cumissiun consista da set commembers numnads dal cussegl federal, che ston esser experts independents. La cumissiun è, concernent sias decisiuns, betg suttamessa a directivas dal cussegl federal e dal departament. Ella è independenta d'autoritads administrativas e dispona d'in agen secretariat. Ella infurmescha la publicitad davart sia activitad e fa annualmain in rapport davart sias activitads per mauns dal cussegl federal.
Il president u la presidenta convochescha la cumissiun a sesidas tenor basegn u sin proposta d'in commember da la cumissiun. La cumissiun po dentant er prender sias decisiuns sin via da circulara.
Tar l'execuziun dal dretg da telecommunicaziun po la cumissiun er far diever da l'uffizi federal per communicaziun (UFCUM) e dar directivas a quel. La cumissiun ha delegà singulas da sias incumbensas a l'UFCUM.

Activitads ed incumbensas principalas da la cumissiun

A las cumpetenzas da la cumissiun appartegnan:

  • La surdada da concessiuns a las offeridras da servetschs da telecommunicaziun e da concessiuns per l'utilisaziun dal spectrum da frequenza da radiofon,
  • La decisiun da las cundiziuns d'interconnecziun en emprima instanza, sche las offeridras da servetschs na cuntanschan betg in accumodament,
  • Dar la concessiun per il provediment fundamental
  • L'approvaziun dal plan naziunal per l'attribuziun da las frequenzas e dals plans naziunals da numeraziun sco er
  • La regulaziun da las modalitads da la purtabilitad dals numers e la tscherna libra da l'offeridra dal servetsch.
  • Ultra da quai decida ella, en cas da violaziun dal dretg applitgabel, mesiras correspundentas e retira eventualmain la concessiun.  
https://www.comcom.admin.ch/content/comcom/rm/start/la-cumissiun/mandat-da-cumissiun.html