Martin Bürki
President da la ComCom
President dapi il 2025
Scolaziun
Martin Bürki ha terminà l'onn 1994 il studi da scienzas da sport e l'onn 1996 il studi dad istorgia dal temp modern a l'Universitad da Berna. Parallelamain ha el cuntanschì il diplom per l'instrucziun en scolas da maturitad. L'onn 2001 ha el acquistà in executive MBA en integrated management a la Scola auta spezialisada da Berna ed a la HEG Friburg. Cumplementarmain ha el frequentà a partir da l'onn 2008 furmaziuns supplementaras sco manager a la London Business School, a la Guanghua School of Management da l'Universitad da Peking sco er da la Hult International Business School.
Activitads professiunalas
Suenter emprimas activitads d'instrucziun en gimnasis ha Martin Bürki cumenzà l'onn 1996 sia carriera professiunala en il sectur d'organisaziuns nunguvernamentalas, sco emprim tar la Lia svizra cunter il cancer a Berna, nua ch'el aveva a la fin la responsabladad per il marketing. Silsuenter ha el midà medemamain en il marketing tar l'ovra d'agid per uffants Terre des hommes a Losanna ed ha absolvì là in engaschament a l'exteriur a Bangladesch.
L'onn 2000 è el entrà en l'economia privata ed ha surpiglià la direcziun da las firmas da reclama Impacta ed Ecofer, duas interpresas affiliadas da la Affichage Holding a Berna. Sin quai ha el midà en il consulting strategic tar Siemens Svizra SA ed a partir da l'onn 2002 è el stà participà sco key account manager per las Viafiers federalas a plirs projects gronds en il sectur da la telecommunicaziun e da l'infrastructura.
L'onn 2008 ha el midà tar Ericsson Svizra SA, è vegnì nominà suenter curt temp deputy country manager ed ha surpiglià a partir da l'onn 2011 la responsabladad generala per il martgà svizzer. El è stà commember dal team da management per l'Europa dal vest e per l'Europa centrala e suenter la separaziun da quella è el stà commember da la direcziun per l'Europa dal vest. Durant quest temp aveva el tranter auter la responsabladad per projects da transfurmaziun strategics cun clients gronds, ha surpiglià la gestiun da la rait d'in grond purschider da telefonia mobila, ha accumpagnà cun success la transiziun da 3G a 4G e pli tard a 5G en la rait la pli gronda da la Svizra ed ha engrondì la collavuraziun en il sectur da mission critical networks, per exempel cun las Viafiers federalas. El ha bandunà Ericsson l'onn 2025 ed è entrà il 1. d'avust 2025 en uffizi sco president da la ComCom.
Engaschaments
Martin Bürki è s'engaschà en differents cussegls d'administraziun e da fundaziun sco er en gremis orientads a la ICT ed è stà durant pli che 10 onns commember da la suprastanza da l'Associaziun svizra da las telecommunicaziuns asut. Er suenter ses temp sco sportist da prestaziun è el s'engaschà per il sport da ballamaun ed oz è el in commember dal cussegl d'administraziun da l'actual vicecampiun svizzer BSV Berna.